一年之後, 仲係好掛住佢嘅味道, 所以放工約咗朋友仔一齊去食.
佢有張tick tick紙俾你揀食咩, 但係你都未必會慢慢揀.
因為店員好快就會問你係咪食雞煲, 佢會叫廚房炒定雞先. (放心! 係nice mode咁問嘅.)
值得一提嘅係, 如果叫豬皮, 建議講明同D雞一齊炒, 因為D豬皮會入味好多, 好食好多.
雞煲單鍋 - 半隻雞 (HK$159)
講返個雞煲先.
我哋3個人叫咗半隻雞份量就啱啱好喇.
佢有得揀大/中/小/唔辣.
我哋叫唔辣都覺得D雞肉好惹味, D洋蔥都好好食.
成個雞煲都勁香.
食完D雞就可以加湯打邊爐.
佢都有幾款湯底揀.
可能個湯底比較清, 我就唔係好食到個湯底係咩味喇, 淨係食到雞煲味.
火鍋 - 清香皮蛋芫茜湯 (+HK$74)
有幾樣食材係值得推介嘅:
1. 自家製即炸響鈴 (例: HK$59)
佢真係即炸㗎.
上枱嘅時候仲係熱辣辣嘅.
我覺得就咁食都得, 口感超酥化, 食落亦唔會有油淋淋嘅感覺.
2. 鬼馬墨魚 (半: HK$35)
即係油炸鬼上面有墨魚滑加蟹籽.
擺落湯底一分鐘就食得.
口感係好豐富.
墨魚滑好彈牙, 蟹籽咬落一粒粒咁, 油炸鬼仲係有少少脆口, 而且吸晒湯底嘅味道.
3. 手切頂級安格斯 (例: HK$239)
唔會太肥又有牛香.
飲品方面, 我哋叫咗降壓解脂洛神花茶 (HK$58).
佢真係好大支, 而且好冰凍.
我覺得依度嘅洛神花茶都幾好飲, 佢比起其他餐廳嘅洛神花茶冇咁酸, 亦都好解渴&好解油膩.
係值得推介嘅.
整體來講, 依度嘅雞煲火鍋真係好好食.
好多雞肉, 而且火鍋材料都好正.
連飲品味道都唔錯.
店員反應快, 服務亦都好好.
所以係值得再嚟嘅!
